Straumavtaler

Tokkepris

Torsdag 15.januar er det slutt på ordninga med Tokkepris til hus og hytter, jf. vedtak i kommunestyret 11.desember 2025.

Grunngjevinga for vedtaket er at staten no tilbyr rimeleg straum gjennom ordninga «Noregspris» = 40 øre/kWh eks alle avgifter, medan pristaket i i Tokkeprisen aukast til 43 øre/kWh frå 15.jan 2026.

Kundar med næringsabonnement hjå Vest-Telemark kraftlag (VTK) og frivillige lag vil framleis kunne kjøpe straumen av kommunen på eksisterande ordning med pristak 43 øre/kWh frå 15.jan 2026.

Eigarar av hus og hytter i Tokke bør no gjera to endringar for å få rimeleg straum framover:

1. Teikne avtale om Noregspris .
   Å inngå avtale om Noregspris kan du gjere på staten si nettside for denne ordninga på Norgespris | Elhub Lenke til et annet nettsted. .
   Noregsprisen på 40 øre/kWh eks statlege avgifter og påslag til kraftleverandøren ligg fast ut 2026.
   Treng du hjelp til å inngå avtale om Noregspris eller har spørsmål som gjeld straum kan du kontakte Tokke Nærtenestesenter v/resepsjonen – tlf 350 75200.
   
   
2. Teikne nytt straumabonnement
   Hus- og hyttekundar som fram til no har hatt Tokkepris må i tillegg få nytt straumabonnement. Dette fordi alle står fritt til å velje kraftleverandør og Vest-Telemark kraftlag kan ikkje utan vidare flytte kundar som har hatt Tokkepris over på ei anna straumavtale som dei tilbyr.
   Har du svara ja på den SMS-meldinga mange har fått frå VTK så har du teikna ny straumavtale, og treng ikkje gjera meir. Ein del kundar med Tokkepris har enno ikkje fenge SMS-meldinga grunna feil, og kan vente seg dette eller å bli oppringt av VTK med tilbod om straumavtale tilsvarande VTK Spot12, dvs at ein slepp månadsgebyret på 39 kr ut 2026. Tokke kommune meiner dette er ei god avtale for kundar i kommunen.

Alle andre straumkundar, slik som forsamlingshus, grendehus, bedehus, klubbhus, ljosløyper og næringsverksemder- bortsett frå kraftselskap, får framleis Tokkepris, og treng i utgangspunktet ikkje gjere noko. Men desse bør likevel sjekke på Norgespris | Elhub Lenke til et annet nettsted., om dei kan få Noregspris. For viss du kan få Noregspris så er målepunktet truleg knytt opp mot ein kode i systemet som ikkje gjev automatisk forlenging av Tokkeprisavtale. Tokke kommune tilrår alle som kan få Noregspris om å velje dette.

Særlege tilfelle
Noregspris har eit forbrukstak per månad på 5 000 kWh for hus og 1 000 kWh for hytter. Straumforbruk ut over dette må du betale full pris for. Enkelte landbrukseigedomar der alt forbruk gjeng på målaren på våningshuset bør gjere ei vurdering av om det kan løne seg å skilje næringsforbruket frå hushaldsforbruket.

Registrerte burettslag eller sameiger der det er fleire kundar (hus eller hytteeiningar) bak eit målepunkt, bør kontakte Telemark Nett på 35 07 57 00 for å få justert straumkvota på målepunktet i tråd med talet på einingar.

Treng du hjelp?
Ynskjer du nærare forklaring på kva for ordningar som finst i straummarknaden eller hjelp til å velje Noregspris, er du velkomen til å kontakte sentralbordet i kommunen på telefon 350 75200 eller e-post resepsjonen@tokke.kommune.no. Du vil då bli sett over eller sendt vidare (e-post) til kommunens rådgjevar for kraftsaker for å avtale kva for hjelp eller rådgjeving du treng.

Rådgjeving og hjelp til å bestille Noregspris kan vere over telefon eller me avtalar at du kjem på kommunehuset og tek eit fysisk møte. For enkelte personar som har vanskar med å ta seg til kommunehuset er heimebesøk også mogleg.